Máis sobre o Entroido

Volvemos a estar metidos de cheo no ciclo festivo do Entroido; nótase no ambiente e aproveitándoo desenvolvemos cos de Carballo Vivo, este venres, unha nova sesión do Obradoiro da Memoria que inicialmente xirou sobre o Entroido. Xa se sabe que o falar non ten cancelas e os temas tratados foron diversos, pero iso é outra historia.
Na reunión, falaban os presentes da celebración do Entroido, concretamente das Pardellas (Condes) e da Laxe (Carballo) e coincidían os participantes que era o propio domingo o día que se tiña o costume de ir correr o Entroido, e o martes era máis de quedar no lugar, comendo a fartar, comunitariamente, nas diferentes casas da aldea correspondente; de aí a denominación do martes --cremos nós-- como Día das sete comidas.

Na vila celebrábase esta festa coa presenza de disfraces que percorrían Friol gastando chanzas e procurando non ser recoñecidos.

A fotografía que achegamos, nesta ocasión grazas a Carmiña do Grande, é unha mostra vilega do Entroido ( cremos do ano 1963), na que podemos observar a dúas mozas disfrazadas como parella máis que posta e a que representa o rol masculino acompaña o seu disfrace cun cigarro --tipicamente varonil naqueles tempos--.
O lugar escollido para a instantánea non sabemos se garda relación cunha visita á institución na procura dalgún "certificado de boa conduta". Seguro que sodes quen de atinar cos membros da parella.

Bo Entroido!